Ramban Indu Ringat Nadai Belaki

Aih... siri kunda wa,
Aih... siri kunda wa.

Udu lain lagu,
Endai bala sida anak indu.
Enti dani pagi,
Kumang Menti ga bentu-entu;
Enti maya lemai hari,
Orang indu selalu runggu;
Enti dani berapi pagi,
Jawai embih tumbang di batu tungku.
Jawai berenah makai,
Rumah dapur basah embih betelutu.
"Lapa dik anak, lapa?
Selama enda macham tu?
Ka ngumbai dik anak banga,
Endai, enda ga dik anak agu,
 Ka ngumbai dik anak gila,
Endai ga dik anak tuyu."

"Ka amai dik indai,
Enda ibuh luba-luba dik indai bejaku!
Ukai enda tegal dik,
Aih, aku indai, macham tu!
Bisi orang lelaki ngayap,
Dik mut-mut enggai badu-badu.
Kemari lelaki ngayap,
Digagai dik enggau repik kayu!
Kati ka aku enda malu indai,
Laban ga dik siku!
Rambau aku nadai bedau,
Tinggal aku siku indai lalu agi nunggu!
Sayau meh aku siku tu indai lalu meragai!

Pesiri ga indai,
Enda aku ngadang dik Singgai enggai,
Tedung, aih, pesiri. 

 
 
 Ramban Indu Ngelaban Indai

Tupai dik kunda wa,
Aih, tupai dik kunda wa.

Nyampau deh penusah,
Ngasi ka anak dara siku aja.
Enti kitai ngerara,
Dikumbai ga nganu sida.
Orang ngayap mayuh amat,
Bisi deh ke beapi,
Endai, bisi aih, ke enda!
"Kita anak anang mai orang gali,
Anang! Enda kita tau baka nya!"

"Tagang, indai, enda alah tagang!
 Kami ke mai orang lelaki gali,
Sigi nunda dik indai agi suba,!"

"Nadai kami endu baka nya!
Uji ibu dik, endu, ga tau tanya!"

"Salam, indai, enda alah salam,
Orang bukai ga mayuh meda.
Dulu suba, ini nambit pintu,
Dik ngeradai muka empelua!
Ujung bilik indai, digaga ka dik tangga!
Sadau. indai,  digaga ka dik unda!
Apai, ama datai,
Berumban ga dik ngatur tangga!
Aku indai, tentu ga baka nya,
Semua, aih, ke tama,
Engkami sigi enda diasuh pulai!