PENGARAP ENGGAU SAMPI NBAN

(Tu dipos aku baru, diambi aku ari bup siti ti tengan ditulis aku ngich ka bala kitai deka nemu pasal asal pengarap asal kitai)

PUN DUNYA NYADI

Cerita Gantallah

          Mula-mula ia kelia, semua utai puang. Tang maya nya bisi siku utai ti benama Gantallah. Iya bisi semengat lalu tau bejaku, ninga enggau meda tang iya nadai kaki jari. Dunya maya nya  puang. Iya lalu ngajih ka dua iku burung nyadi. Burung dua iku tu nepan di atas chapi lalu ngaga langit, tanah enggau Batang Lupar ti lalu nyadi ka indai semua sungai dalam dunya tu. Laban tanah ti digaga seduai ngelui pemesai dunya, nya alai seduai iya lalu ngempuk tanah ti lebih lalu ngaga nya nyadi bukit enggau munggu. Tembu nya sida ngaga babas enggau kayu. Udah semua utai nyadi, seduai iya lalu nguji ngaga mensia ngena kayu  ti diraut. Tang pengawa nya enda mujur. Udah nya, seduai iya lalu ngena batu ti ditingkuh awak ka baka mensia. Pengawa tu pan enda ga mujur laban batu nya enda nemu bejaku. Nyau kelama-lama, seduai iya lalu nguji ngena tanah liat ti udah digulai enggau ai lalu dikempuk nyadi mensia. Tubuh, lengan enggau kaki iya diiri seduai iya enggau getah kumpang ti sigi endang mirah, awak ka nyadi darah iya. Lebuh iya dikangau ka seduai, iya pan lalu nemu nyaut. Maya hari panas, tubuh iya neritik pansut peluh. Lebuh iya nyau besai, iya ngaga ka diri indu ka bini ari tanah liat. Anak seduai iya lalu ngisi dunya tu.

Burung Ara Enggau Burung Iri

         

          Nitih ka siti agi cherita, dua iku petara ti baka burung benama Ara enggau Irii melepung di atas tasik. Seduai iya lalu nyambar dua iti utai ti baka telu. Ari nya, Ara lalu ngaga  langit, Iri lalu ngaga tanah. Laban tanah besai agi ari langit, nya  alai petara dua iku nya lalu meleku ka tanah nya awak ka chukup dibap langit. Nya meh kebuah munggu, bukit, lebak enggau sungai lalu nyadi . Kayu enggau babas mega lalu tumbuh. Meda nadai bisi orang ngani dunya, nya alai petara dua iku nya lalu belabuh ngaga mensia ari kayu. Kayu ti terubah ditebang seduai iya enggai nyadi dikena laban ia mansut ka ai burak. Kayu ti kedua mansut ka ai mirah tang ia mega enggai ngadi dikena laban lebuh seduai iya deka bejaku enggau iya, mensia ti udah diban seduai nya enda nemu nyaut. Seduai iya lalu ngaga mensia ari tanah kempuk, siku lelaki, siku indu. Mensia dua iku nya pan lalu nemu nyaut. Nama seduai iya lalu diberi Tanah Kempuk.

Cherita Raja Entala

          Dulu kelia Raja Entala tauka Kree Raja Petara enggau bini iya ngibun dunya ti bedau nyadi. Nyau kelama, seduai iya lalu serabana laban dunya nadai bisi langit, tanah, rumput tauka sungai. Seduai iya lalu bebai ngikih tanah ari tubuh seduai. Daki nya tadi lalu dikena seduai iya ngaga tanah. Tembu nya seduai iya lalu ngikih daki diri baru lalu ngaga langit tang langit nya enda ulih ngebap tanah. Raja Entala lalu ngeruyup ka tanah ngena jari iya. Nya ti ngasuh dunya bisi bukit, lebak, sungai enggau emperan. Utai ti tumbuh dulu ianya lumut, paku enggau lanjang tauka lemiding. Utai tu dientudi ka rumput enggau kayu. Siti ari bansa utai ti tumbuh ianya Pisang Rura. Iya ngayap burung Iri lalu anak suduai iya nyadi semua bansa ikan. Raja Entala mega lalu ngeban mensia ari pisang bangkit. Mensia nya lalu diiri seduai iya enggau getah kumpang ti bechura mirah. Bini Raja Entala lalu ngebap mensia nya enggau pua kumbu. Udah Raja Entala ngangau kali ketiga, lelaki dua iku lalu angkat. Siku diberi nama Telichai Tuai Kitai, siku nama Telichu Tuai Antu. Telichai nurun ka Iban lalu Telichu nurun ka antu.

Cherita Petara Enggau Siti Awa

          Nitih ka cherita ari ulu Lemanak, dulu kelia bisi orang lelaki siku ti diau di sebelah madang buluh aur. Nyau kebangai utai, iya meda beris iya kembai. Lebuh kandung iya nya nyau besai, betis iya lalu dibuntas iya enggau dikin. Dia iya meda indu siku pansut. Petara lalu meri indu nya nama Siti Awa lalu ngasuh seduai iya jadi. Orang lelaki nya lalu munuh anak tuai seduai iya. Kerat anak nya ditanam ka iya di sebelah umai ti alai sida lalu tumbuh nyadi entimun, juna, entekai, labu, jawa, ensabi, padi enggau engkundur.

Petara Dalam Pengarap Iban

          Dalam pengarap Iban, petara ti pemadu bekuasa endang siku aja. Iya nadai kala diambi ngabang laban kereja iya tekelalu mayuh. Tu meh kebuah lebuh Iban sakit nyau deka mati, manang nadai besampi ngagai Sengalang Burung, Pulang Gana, tauka petara bukai ti suah disebut sehari-hari tang sida besampi terus ngagai Petara munyi tu:

Raja Petara bela ngemata,

Serengendah bela meda,

Ngemeran ka subak tanah lang.

Seregenda bela meda,

Ngemeran ka ai mesai peluh gerunung sanggang.

Seregendi bela meda,

Ngemeran ka jumpu mesai jugu bejampung lempang.

Selendeding bela meda,

Ngemeran ka tinting lurus mematang.

Silingiling bela meda,

Ngemeran ka pating sega ensuluang.

Segunggung bela meda,

Ngemeran ka bungkung mesai benung balang.

Bunsu Rembia bela meda,

Ngemeran ka jengku tapang bedindang.

Bunsu Kamba bela meda,

Ngemeran ka bila maram jarang.

Bemata Raja Petara bela ngemata sampal nilik,

Ari ramang rarat bela nampai ngijap,

Baka kempat kajang sebidang.

Ari pandau banyak bela nampai Petara Guyak,

Baka pantak labung palang.

Ari pintau kemarau sanggau bela ngilau Petara Radau

Baka ti ulih likau nabau bekengkang.

Ari dinding hari bela nampai Petara Menani, manah mati,

Baka kaki lung tetukang.

Ari bulan bela nampai Petara Tebaran,

Betempan kaki subang.

Ari matahari bela mereni Petara kami, manah mati,

Baka segandi manang begitang.

Ari jerit tisi langit bela nampai Petara Megit,

Baka kepit tanggi tudung temelang.

Ari panadu bunyu Petara Megu bela sampai

Mesai langgu ketunsung layang.

Bala Iban mega suah besampi bunyi itu:

Langit Petara dulu mibit,

Mesai dunggul manuk banda;

Tanah Petara dulu ngaga,

Mesai buah mawang melanja;

Ai Petara dulu ngiri,

Mesai linti tali besara;

Tanah lang Petara dulu nenchang,

Nyadi mensia.

          Lebuh Iban begawai, Petara enda kala nurun diambi ngabang. Nya alai, lebuh maya Gawai Kelingkang lebuh orang ti ngambi Sengalang Burung ngabang ngagai dunya tu mansa rumah Petara lalu mai iya ngabang, iya lalu nyaut bunyi tu, “Aku enda tau nurun  ngabang laban enggai ka anak mensia bisi kena tinggang panusah. Indah ka aku ngantuk sekajap tauka mandi ga sida bisi kena bebadi tauka tetungkam.”

          Tu meh kebuah, manang miau orang ti sakit enggau manuk bunyi tu:

          Labuh daun buluh;

          Tangkap ikan dungan;

          Antu ka munuh;

          Petara naruh ngembuan;

         
          Labuh daun buluh,

          Tangkap ikan empelasi;

          Antu ka munuh;

          Petara ngaku menyadi.

          Labuh daun buluh,

          Tangkap ikan semah;

          Antu ka munuh;

          Petara ngambu serumah.

          Labuh daun buluh,

          Tangkap ikan juak;
          Antu ka munuh,

          Petara ngaku anak.