DUNGAI BELEMATANG (2)

(Ditu aku nampung ensera dalam Dungai Belematang. Di baruh nya leka iya dalam leka dungai Niang Tuai Rumah Tulis ari Kara, Ulu Pantu)

"Eh endu," ko indai iya nyaut, "dek ti merampau baka nya ngemalu kami duai apai nuan enda piga-iga.  Enti aku nemu dek bangat tau merampau baka nya, nyau enggai turun ngagai umai endor kitai nanam pun padi putong ketegal ti ngenang bujang ti nadai ngundang dek di simbang papan padong, manah agi aki muai dek kelia leboh dek agi di kebuyan alam kandong.  Manah agi enti aku kelia ngerasa dek enggau lungga mata rantong, ngelam dek di kempisan munjong bejumpong."

            Ninga jako indai iya bangat renjan, bangat nadai bisi sinu ka iya, Kumang Jawai lalu nyaut, "Tu aku indai beradai karong kerubong.  Diatu tau meh dek munoh aku.  Bunoh amai ka aku ulih dek awak ka aku sulai mantai pumpong.  Enda pia udah meh aku dipejera sida bujang rengayong.  Nama, mensa ni neh indai penjuang tanah langgong endor aku luloh mabun pumpong, nadai bulih mensa kerong tuchong pemansai."

                Sinu mega indai Kumang Jawai ninga saut iya baka nya.  Iya lalu bekenanah mansang nudok ka diri ngimbai anak iya.  Enda berasai, disepi iya ai mata iya nyau nelian laboh ngerunong.

            "Bisi dek nguji ngetan ka ambai dek anak?" ko indai Kumang Jawai nanya.

            "Ukai ka enda meh indai," ko iya nyaut, "Bendar amai aku tu ngiga utai dikena, ngiga jayau dikena ngemulai iya ka aku.  Dayak, indai, embih endor aku begiga; Tambi, embih endor aku madi, nadai meh aku bisi tetemu ka jayau.  Nga dek kelia indai, nama ti enggau dek ngulih ka apai ngasoh seduai begulai di kerigai berimbai beradong, ti ngasoh seduai begulai di lantai begantong kibong? Pama indai, enti dek agi bisi nyimpan jayau dek nya."

            "Endai anak," ko saut indai Kumang Jawai, "kami kelia nadai maioh macham.  Aku tu kelia nadai bejayau, ditanya orang memanah, diambi orang enggau chukup adat, dipangkong ka orang engkerumong, dipegai ka orang bebendai."

 

            Eh...sayau mega melebu bepumpong punggu,

            Nyelai ka legai di langgai sungai,

            Udah serabana indu baru nganding

            Serabana mengada karong mengindai.

27

Nyampau serabana indai Dara Rabai Geruda

Da menoa Bumbu Parong,

"Tu ti aku nemu dek neh anak bangat enggai agi

Turun di pun padi putong,

Selalu bakenang orang ka bujang nadai agi

Ngundang dek da simbang papan padong,

Nadai agi enchuri dek di penani agi mengkutong;

Nadai merunsai ka dek anak andai da bungai Rampang dudong;

Maia aku kelia bisi dek da buni buntal ngembong,

Enti maia aku kelia meram dek Endu dara Sudan

Di kebuyan alam kandong;

Enti aku nemu dek baka tu guna meh dek aku

Rasa kelia anak engka dek dia,

Enggau lungga mata rantong;

Dek ada kelia ada gelam di tengkuan di kepisan

Mujong bejunpong."

Ai...lalu ninga Endu Dara Intan Gemala Panggum Naga Lua Tedong,

"Tu aku indai ti beradai karong kerubong,

Bunoh amai ke aku ulih dek indai

Awak ka aku parai mantai pumpong;

Enda pia udah meh aku dipejera

Sida Sempungga Bujang Rengayong,

Mensa ni neh indai penjuang tanah langgong,

Endor tuboh aku luloh mabun pumpong,

Nadai bulih mensa kerong tuchong pemansai."

"Eh...enti bakatu enta lebu

Aku kelia meh anak selantang anak tengkuan,

Aku kelia ta bisi ka dek da buni buntal dalam;

Aku kelia ngandong ka dek nyempuyong tuboh ganggam,

Ti dek ada kelia mengada,

Nyawa dek kekela aku didinga salanting remembam,

Pama dek aku rasa enggau lungga mata jempilan;

Lalu aku nyak kelia kechiak, gelam di kempisan,

Awak ka dek lesi mati danjan."

Laju ninga Endun dara enggau telinga pending kanan,

"Tu aku indai beradai karong menyimpan,

Bunoh amai meh aku ulih dek indai,

Awak ka aku sulai mantai nampal Sebayan,

Mensa ni penjuang tanah lantang pala emperan,

Endor tuboh aku luloh mabun danjan,

Nadai bulih mensa tempangan kasih dasan tisi pegai."

28

            Sayang....kasih sayau....sayang meh da pedara

            Pajoh bubu ridan pegai disan tani da peruan,

            Kasih dasan nanga sungai.

Eh...ti bakatu nyau nanya ga indai iya

Ninga Dara Rabai Geruda,

Bekata indai nyaya da ai mata laboh ngerunong,

Ninga iya nyau nengkuyong uchong

Ka dalam kibong gantong di lantai.

Eh...dua kali legai da langgai sungai,

Udah endu serabana indai,

Baru anak iya nyau berandau enggau

Mengada iya karong mengindai.

"Eh...Dayak indai embih aku giga,

Tambi embih endor aku madi,

Aku ka ngiga pugai, neh indai jayau duyong,

Ni nga dek kelia ti enggau dek ngulih ka apai

Ngasoh seduai begulai di kerigai beimbai beradong,

Ni enggau dek ngasoh seduai apai begulai

Di lantai gantong kibong,

Engka dek bisi nyimpan indai

Peminan batu tandok ikan jayau duyong?"

"Apu! Kami nadai pan karong kerubong,

Kami sa apai dek kalia begulai

Da lantai gantong kibong,

Di pangkong ka orang engkerumong pegai ka bebendai."