PENGARAP ASAL IBAN
                                     (Tusun Ketiga)

PULANG GANA

          Sekeda orang madah ka Pulang Gana tu siku ari tiga tauka lima iku diri menyadi. Hari siti iya lenyau. Udah ngiga iya empat lima hari, bala menyadi iya ngumbai iya nyau mati dipakai antu tauka diempa jelu. Sida lalu ngintu pemati iya lalu ngulit. Keresa iya lalu ditumbak. Siku ari menyadi iya lalu nikau ka sekepuk tanah, madah ka nya bagi Pulang Gana.

          Lebuh maya bumai datai, bala menyadi iya lalu nebang. Tang meh pagi siti, sida meda kayu ti udah ditebang nyau bediri baru. Utai ti nyelai baka tu nyadi berari. Nyau enda liat sida menyadi, sida lalu bebai ngemata ka sapa ti bangat beduan sida iya. Lebuh hari udah malam, dia sida meda bala jelu begulai enggau Pulang Gana niri ka kayu ti udah ditebang. Lebuh sida nganu iya, dia Pulang Gana madah ka tanah ending enggi iya lalu enti sida deka beguna ka tanah, sida mesti minta pemendar enggau miring ka iya sebedau berengkah bumai lalu mega begawai udah sida udah ngetau.

          Piring nitih ka pemakai asal Iban. Iya belabuh enggau pengawa makai pinang enggau nginsap. Nya alai orang miring belabuh enggau sirih, kapu, pinang enggau sedi. Tembu nya dititih ka semakau enggau ruku. Udah nya baru dikenudi ka piring ti bender baka asi, pulut, garam, tumpi, rendai enggau telu manuk. Piring nya lalu ditata enggau tuak.

Sebedau meri rendai ka dalam piring, suah orang nabur ka rendai ngagai orang ti begelumu dia awak ka sida bulih tuah, bulih limpah ketegal ti meda orang miring dia.

Piring tau digaga ngagai tiga, lima, tujuh tauka sembilan. Reti nya piring dibelah, dipechah tauka dichebik ngagai penyampau ti dikedeka kitai. Tingkat piring tu nitih ka pemesai pengawa ti dikereja, besai agi pengawa, mayuh agi pechah piring.

Nitih ka pansik Padri Howell di Sabu, Simanggang, apai Pulang Gana ti nadai kaki, nadai jari ianya Petara. Anak ti kedua Petara indu tang nadai idung. Iya disimpan Petara dalam perau mit lalu dianyut ka iya. Nama iya Raja Jewata. Iya lalu nyadi raja bala ikan. Anak Petara ti ketiga mega menawa, nadai bisi baka tubuh mensia. Iya digitang di dan kayu lalu nyadi rajang, nyadi orkid. Anak ti keempat  nya indu. Iya dipepat Petara lalu nyadi padi, entekai enggau buah bukai. Anak ti kelima lelaki lalu dikumbai Belang Pinggang laban punggung iya belang. Iya lalu nyadi Ini Anda lalu diau di langit. Anak ti keenam nyadi jelu enggau burung. Anak ti ketujuh indu lalu  dikumbai Dayang  Petri.

Nitih ka siti agi cherita, Pulang Gana dikelakar bala menyadi iya. Sida iya enam iku lelaki lalu siku indu. Nitih ka cherita tu, hari siti Pulang Gana nitih ka landak ti ngachau redas ti alai iya nanam abuk, entekai, jagung enggau sayur bukai. Iya tama lubang di kaki bukit nitih ka landak nya. Nyau ke bangai-utai iya rembus di  sepiak bukit nya di menua Samerugah. Dia iya mujur ngubat ulun Samerugah ti tengan sakit. Ka upah, iya diasuh Samerugah milih siku ari anak iya tujuh iku ka bini iya. Iya milih anak Samerugah ti bunsu ti benama Endu Serentum Tanah Tumbuh Yak Serendak Tanggi Buluh. Tang lebuh Pulang datai di menua, bala menyadi iya udah bebagi ka reta. Iya nadai bagi laban sida ngumbai iya udah nyau mati. Lebuh iya minta bagi ka reta, siku menyadi iya lalu ngambi tanah lalu nikau ka tanah nya nuju Pulang Gana. “Nah! Ambi tanah tu. Tu meh bagi dek!” ku menyadi iya nya. Nya meh kebuah Pulang Gana lalu bempu tanah.

Pulang Gana diau dalam tanah dalam Bukit Giling Chiping. Dia meh endur orang ngambi iya lebuh  Gawai Batu maya orang deka nebas umai baru. Pulang Gana datai ngabang diserumba bini iya enggau bala anak iya ti benama Benih Lela Punggang Tengian Dara Bintang Tiga Datai ka Jelan; menantu iya Aji  Ti Berani Ngilah Bulan Suka Raja Rengayan; dua iku ulun iya ti benama Bengkang Bujang Penyadung enggau Ingkat Apai Renggat Pangkung Tutung. Kedua-kedua seduai tu ending jelu ti diau dalam lubang tanah.        

Pulang Gana mega dikangau lebuh nanam lubang pemun maya kitai ngaga rumah. Maya tu siku jani dibunuh ka genselan.  Pulang Gana mega dibasa maya kitai niri ka tangga udah rumah kitai nyadi. Lebuh maya kitai niri ka Gawai Mangkung Tiang piring mega diengkah di dapur dikena masa Pulang Gana. Sebedau numbak lubang ka orang ti mati, berau tauka asi mega ditabur di atas tanah nya dikena meli tanah nya ari Pulang gana.

Semerugah Tauka Sebegindah

          Semerugah tauka Sebegindah suah disebut begulai enggau Pulang Gana. Kadang-kadamg iya dikumbai Petara. Nya meh kebuah dalam sampi iya disebut Semerugah Raja Tanah tauka Sebegindah Raja Tanah, Sebegindi Raja Ai, Sebegindit Raja Langit.

          Semerugah meh Petara ti madah ka Iban enda tentu bulih padi laban sida besebut ka nama mentua. Nya meh kebuah iya madah ka bala Iban enda tau sekali-kali nyebut nama mentua.. Mentua lelaki patut dikangau ka kitai “aya’ tauka ‘bapa”; mentua indu dikumbai ‘ibu’; ipar ti biak dikumbai ‘adi’; ipar ti tuai dikumbai ‘ika’.

          Di baruh tu ianya siti agi cherita tuai ti bekait enggau pengarap pasal Pulang Gana.