BERATI KA PEMANAH JAKU IBAN DALAM ENSERA

(Ditu kitai berati ka pemanah jaku Iban ti dikena dalam ensera. Ditu lemambang ti beensera ngena enteli "ridan". Reti nya tiap ujung rintai jaku iya beujung enggau "an") Ensera tu digumpul aku lalu disimpan aku dalam bup ensera ti udah dichelak aku. Nama bup nya Ensera Pelanduk Enggau Tekura. Bala ti deka nyimpan bup tu ka bala uchu ichit tau sms ka aku 0193827107.

AUM MANANG GAGAK ENGGAU SIDA PELANDUK

Hari siti anak mensia baum enggau semua jelu, sida Rusa, jani, Kijang, Enturun, Beruang, Ingkat, Bengkang, Munsang, Bejit, Nyumbuh, Empeliau, Kera, Rasung, Engkuli, Sinang, Tupai, mayau enggau Pelanduk.

        Jelu pen seribu udah datai, anak mensia pen lalu bejaku, “Aku tu pia,” ku jaku anak mensia, “mai kita bumai. Kita salah, puas makai padi kami, semua kita jelu.”

          Lalu ku Jani, “Aku ka!”  Jani  bejuluk Serambi Langkau Uan.

          “Aku ka!” pia ku Rusa bejuluk Gangga Guntur Demaram.

          “Aku ka!” Nya jaku Kijang bejuluk Simbang Jerungkang Tanam.

          “Aku pia!” ku Pelanduk bejuluk Kayu Alah Sengapa Alai Nepan.

          “Aku ka!” ku jaku Engkuli bejuluk Pua Kumbu Tenun Endu Puyu Berujan.

          “Aku ka,” nya jaku Beruang bejuluk Beliung Kabang Pemungga Batang Ban.

          “Aku ka,” nya jaku Munsang bejuluk Rambut Ubung Gadung Kena Lulong Ngelapung Baja Anyam.

          “Aku ka,” pia ku Bejit bejaku beirit-irit munyi trumpit baris meriam.

          “Aku ka,” nya jaku Nyumboh, bekaban mayuh bunyi antu bala teguran.

          “Utang kati baka pengawa ngereja umai?” pia ku jaku semua jelu.

          Lalu manang Gagak bejaku madah ka pengawa ngereja umai.

          Ku manang gagak, “Dulu kita ngiga tanah, udah bulih tanah nya baru kita beburung; udah nya baru kita manggul; udah manggul, nebas; udah nya nebang, nunu, nugal, manun, ngetau, ngindik, nyembui, ngisar, nutuk, nampi, nyumai, baru tau dipakai.”

          “Oh! Enda ulih kereja,” pia ku Jani, “nyamai agi aku mai kaban diri empu nyengkuran.”

          “Aku pia,” jaku Rusa, “nyamai agi mai kaban ayah ngiga ulam.”

          “Aku pia,” jaku Kijang, “pama agi ti aku mensiang batang perugan lengkan.”

          “Aku enggai meh bumai,” nya jaku Beruang, “beguna agi enti aku beridup ka labang madu renyuan.”

          “Aku pia,” nya jaku Pelanduk, “nyamai agi enti aku nganti pengelabuh buah buan.”

          “Aku enda meh bumai,” nya jaku Engkuli, “nyamai agi aku idup ari pangan.”

          “Aku enda mega bumai,” pia jaku Munsang, “nyamai enti aku ngiga sarang burung sengayan.”

          “Aku enda meh bumai,” nya jaku Kera, “aku tau idup ari upa senggang senganan.”

          “Kaban aku enda meh bumai,” pia ku jaku Bejit,  mupuk ngelesit buah berangan.

          ‘Aku enda mega bumai,”  pia jaku Tupai, ngadang diri idup ri tangkai pinang rutan.

          “Enti munyi tu, nadai bumai meh semua kita jelu,’ ku Manang Gagak.

“Utang enti kita Jani puni padi kami, kita busung pngka peti ngelingi sepan;

enti kita Rusa makai padi kami busung pangka amba jarin rutan; enti kita

Pelanduk makai abuk, kita busung sintak panjuk beumpan buah buan; enti kita

Kijang makai jabang, kita busung tama pencharan.”

Tu  jaku manang Gagak enggau sida jelu mayuh.