Sanggai - Iban love song -  of a man telling his lady their love will never be fulfilled

            Sanggai is used to offer drink to visitors and to each other during merrymaking. It is used to praise, to motivate and to honour a person. Below is the last verse of  the Sanggai of a man whose eyes have met those of a lady but he says that they will never be fated to be together:

Aih, dia deh aku Kumang Jawai ti bejalai,

Nengah tembawai udu panjai madang lensat,

Aku meda sibau pemadu mansau, udu pengelebat,

Ka aku niki wai menyadi,

Tulang aku lemi enda alah pakap,

Ka aku nyarau iya Kumang Kumbau,

Isau aku lembau enda uluh mantap;

Ka aku nyulok iya Kumang Demok,

Laban penyuluk enda ulih datai sipat;

Tang bisi buah Kumang beremah,

Labuh ka tanah ka arung lengkap,

Ka aku pakai, nyawa aku enggai,

Enda ulih nyuap,

Sayau meh tua  Kumang Jinap,

Sama kalat-kalat, ninga dek Kumang,

Ngema mengkalang, aih puang.

(I am like a sojourner,  Godess  of Beauty, Jawai,

Passing orchards of lensat trees bearing fruits,

I want to climb the fruits, dear sister,

My bones are weak, I cannot embrace the trunks,

I dearly wish to lop the branches,

My  sword  was lethargic and it could not be cut,

I want to use a long  stick ,

But it  cannot reach the fruits,

But,  Godess Beremah, some fruits have fallen to the valley,

I want to eat  them but  I have no appetite,

My mouth refuses to open,

What a pity our fate is thus,  Godess Jinap,

Both wandering aimlessly, Godess,

Bringing  on our backs mengkalang,  the  empty baskets.

PENGAP SENENTANG SIDA SENGALANG BURUNG MENDING KA BURUNG

Tu Pengap orang Balau. Kelia sida dibai Raja Brooke ngalahka sida Ngumbang, sida Ason enggau sida di Batang Ai ti bisi angkat ngelaban Raja Brooke. Tu sejarah ti nadai tau dikenggaika kitai. Sida orang Scotland kelia bendar amai meh bekayau enggau orang English. Tang semua pengawa nya ditulis sereta dipelajarka  sida magang laban nya History, ku sida. Ba genteran ditu Sengalang madahka burung jai enggau burung manah.  Orang kelia ngangau ka mentua "Bapa" lalu mentua ngangauka sida "apai uchu"
Genteran tu  diambi ari bup aku, PENGAP GAWAI KELINGKANG NEMPALAI KASAI ti tengan dichelak lalu disangka keluar ujung Bulan Duabelas tu ila.

Bu nusu menalu,

Baru midung di rapi kampung,

Bala sida Bekubu ti ngetu,

Nyau bebai mending ka burung.

Belawa Ketupung ka lempa pala langgung,

Lalu ninga ketupung beterantang di punggang arung.

Lalu beguai iya pulai ngagai mentua iya

Lai Bejambai Sengalang Burung

Ngagai tisi nenalan landung,

“Ketupung  bisi aku ninga dia tadi, bapa.

Kali tau ka burung bala kitai ti deka ngeranggai senawai leka nibung

Ngagai Batang Menyang Ulu Lemujong?”

“Uh! Nya nadai tau apai uchu .

Nya ga burung tamang nuan, burung tengkelak!

Baka nya sekali-kali  burung sida kelia

Di Lemenyang Batang  Lemujong

Sida ti ka nyerang ngagai Batang Balau Chundung,

Kera empai datai di Batang Balau Chundung,

Sida bebadi mati ilang pumpung, tua' sida Lemujong,

Beserenggung alam kampung beban ka rarung ngerakup kayu.”

Lalu belawa Bujang Berangai ka lempa tanah nyadai,

Datai dia tedinga ka beragai,

Lalu madah ka  mentua iya Lang Banda Sengalang Nyakai.

“Beragai bisi aku tedinga dia tadi bapa,

Tau nya ka burung kitai ti ka ngerampas kemantan panas

Ngagai sida Kayan Kenyah Long Linei?”

“Uh! Nya nadai tau, apai uchu,” pia ku jaku Lai Bejambai,

“Nya burung tamang nuan, burung tampak.

Baka tu sekali-kali burung  sida  Menyang Batang Entabai,

Ti ka nyerang kitai ngagai Batang Balau Nyuntai,

Lapa sida bedau datai ditu, dudi sida nyerang,

Ngalah ka rumah kitai nyampau pemanjai,

Dulu sida Entabai bebadi mati  ilang parai di tunggul tuai,

Nya ga nguai ka sabak luntai sida indai Embai.”

Balawa Kutuk ka lempa punggang teluk, “Kutuk bapa!”

“Uh! Nya nada tau, apai uchu,” pia ku Lai Nyakai Lang Benguk.

“Nya ga burung tamang nuan, burung bebanchak!

Enti pia, midung nuju gembi tajar bediri,

Ubah lengkan rendai renayan;

Ditu  apai uchu, burung enggai bebunyi,

Aram kitai angkat pindah palan.”

Udah retih kayu bekalih,

Nuju legai di langgai sungai

Sida ti mending ka burung bedau bulih,

Lalu mupuk angkat bejalai.

Nyau begerunyu bala buntu nunda kayu tebang ka jamban.

Orang ti dulu manggai di lengkap endur kesindap angkat begelih.

Nyau manggai di emperan endur sengayan bebung bebintih.

Baru tepanggai di lembang balai kendawang

Bebau sinang manchak idung;

Baru manggai di lempa balai sawa muka sengkilung.

“Ditu bu, apai uchu, menalu nusu,

Nuju midung di rapi kampung.”

Bala sa Bekubu ti ngetu,

Sengalang Burung nyau mending ka burung.

Lalu bejalai kera Lang Bejambai ka lempa tanah nyadai.

Dia tepeda ka lachau kuai, dua iku begagai betiti ragai daun wi.

Bejalai Lang Laut ka tanah lembut.

Dia tedinga ka sabut enta dedikut mati menchaie.

Bejalai ga Apai Migu ka lempa tanah munggu,

Dia iya tedinga ka dundun nyedu enta deduru

Munyi ti mutung geru batang rekung.

Bejalai Bejambai Lang Menari ka lempa tanah tisi

Begulai enggau Apai Manggie,

Dia tedinga ka bali api nyampau penyadi

Bunyi ti betiti bentali tulang perabung.

“Retih midung di junggur kampung,

Udah bulih burung, nama ti enggau ngerempung?”

Baru bejalai sida Lai Bejambai Entebunau Labang

Ka lempa tanah lembang,

Dia tepeda ka beruang tak jejagang,

Pulai nyengkubang bukang sida Menyang

Tumbang berawai ka bentang tajau menaga .

Baru bejalai Sengalang Burung ka lempa tanah langgung,

Dia tepeda ka remaung tak rerenjung pulai bedunjung bukang mensia.

Midung di rapi kampung,

Nuju lengkan renai renayan.

Udah sida ngerempung ka burung,

Betubuh pulai ka palan.

“Badas, apai uchu, burung kitai dipandung laba.

Mimpi kitai sigi ngasi, aku’ ka bisa, naka pengena, apai uchu,

Bunyi ka kiba, kingka ka kanan,

Burung tu mali rampung, batang jalan.

Baka tu meh niang Apai Tali kelia

Iya ti ka nyerang ka Batang Ulu Ai, ka ngayau mansang kediri,

Ma kita enda nanga Apai Tali, nyau nadai alah bai isi seladan?

Baka tu meh burung niang Apai Rabai kelia,

Iya ti ka nyerang ka Batang Ulu Entabai,

Ti ka ngayau nadai bebala besai,

Ma kita enda ninga Apai Rabai, bulih amai,

Barat berangai penuh langkan?

Baka tu meh burung Empati kelia akan,

Ti ngerampas leka begumba, balang begigi,

Ma kita enda ninga Empati, ti bebadi mungkal bedilang?

Nga Ginti kelia baka tu meh burung,

Iya ti ngerampas buah gemiah rarah balang bengeli,

Ma kita enda ninga Ginti, bulih sigi, ngambi dengah orang?”

Udah midung junggor kampung,

Nuju legai di langgai sungai.

Udah sida mending ka burung,

Betubuh angkat bejalai.

Jalai Iban Ngintu Pemati

          Sereta meh orang orang nya deka mutus seput, deka mati, bala orang ti ngemata ka iya sereta enggau kaban belayan iya ti bukai lalu nganjung utai ti patut dibai iya mati pulai ka Sebayan, baka gari, duku enggau utai bukai ti dikesayauka iya. Enti orang nya indu, orang meri iya keresa indu baka kain, belia enggau utai bukai ti dikena iya maya iya agi idup, agi kering suba. Udah iya mutus seput, orang nadai tau meri iya utai agi. Semua utai ti diberi nya dikumbai baya' lalu ditumbak dalam pendam enggau iya. Kadang-kadang utai nya disimpan dalam lumbung iya. Tang kadang kadang bisi ga orang nganjung baya' lebuh iya lama udah ditumbak. Maya tu, sida ti takut, ti buyan tauka enggai bangat kiruh lalu nganjung sebelah bandir kayu ti bebesai ti pama penyauh ari pendam.

          Udah orang nya mutus seput, mata iya lalu ditutup orang ti ngibun iya baka anak tauka bini iya. Pengawa tu besai amai reti laban lebuh bebagika reta iya, orang ti "mejam, nanggam" iya ti lebih bekuasa ari orang bukai. Udah nya, bangkai nya lalu diberi mandi, diberi begari lalu dada iya ditabur enggau berau. Berau nya dikena minta Petara ngampun penyalah orang ti mati engka iya bisi enda bebasa ka penti pemali ti ngasuh iya sakit lalu ngujungka iya mati. Tembu nya, iya lalu dibai sereta digalika di ruai, di atas tikai ti alai iya mutus seput tadi. Bangkai nya lalu disiding enggau pua kumbu. Bala sida ti indu lalu belabuh begumpul nguan iya. Siti ari kebuah bangkai orang ti mati nya didinding tauka disiding laban enggaika diperaka ukui tauka mayau. Nya mali amai laban Iban nyangka bangkai ti diperaka mayau tauka ukui deka nyadi antu.

          Baya' orang ti mati lalu dibai ka ruai. Api mega lalu diidupka di ruai lebuh hari nyau lemai. Tu dikumbai nungkun api Sebayan. Di tisi nya mega lalu disediaka orang berau sereta ditambatka orang manuk siku. Enti orang deka mai lumbung iya niki, orang mesti ngenselan jani. Tang enti nadai jani, mesti ngenselan ngena manuk dua iku, laban jani bisi empat iti kaki lalu manuk dua iku pan sama bisi empat iti kaki.

          Agi kelia orang nadai nyenggai orang ti mati lama laban sida nyangka lama agi sida nyenggai, mayuh agi ga bala antu datai niki ka rumah. Maya suba, sereta meh orang parai, iya dikumbai antu. Nya meh kebuah lebuh nurun ngubur ka parai dikumbai "nganjung antu".

          Lemai sebedau orang nganjung bangkai orang ti mati nya, lemambang sabak nyuran tauka nyabak bebuah.

LEMAN GAWAI TI DIKEREJA BALA IBAN

           

            Iban begawai laban bisi utai deka dipinta ari Petara tauka tegal deka meri terima kasih ngagai Petara. Tang enti orang rami ngapa, nya dikumbai orang makai di ruai.

            Gawai tau dibagi ngagai tiga iti bidang:

      I    Gawai Antu - dikena ngintu orang ti udah mati.

      II   Gawai  ngagai Pulang Gana enggau Sengalang Burung - dalam gawai tu orang minta utai ari Petara  ngena piring.

      III  Gawai bukai - baka ngintu mimpi; meri terima kasih ngagai Petara laban udah bulih utai berega baka tajau tauka udah niki pangkat dalam kereja tauka laban udah gerai ari penyakit.

      I   Gawai Antu -  Gawai tu dikena ngujungka kitai ngulit ka orang ti udah mati.

      Berantu  tauka Ngambi Sabayan ngabang - Gawai to dikena ngambi orang ari Sebayan ngabang. Tu ketungkah iya kitai begulai enggau sida Sebayan.

            Gawai tu dikereja sehari semalam. Pagi hari nyadi tua sabak nyabak bebuah berayun dalam bilik orang ti bisi antu. Bala indu ninga ke iya nyabak. Sida ti lelaki kiruh di ruai.

            Lebuh hari nyau lemai terunji deka malam, ayun tua sabak lalu dipindah ke ruai. Iya lalu nyabak datai ke dinihari. Ma orang ti diperantu lalu diisi enggau gari sereta enggau perengka  ti dikena iya lebuh iya agi idup suba. Utai dipakai mega diisi dalam lanji nya. Utai dipakai mega diayan semak ma nya.

            Udah makai lemai orang lalu ngetas ulit. Maya tu semua orang ti ngulit lalu ngena baju ti bechura piam ti patut dikena orang ngulit. Indu ngena kain kanggan tauka baju putih sereta ngena tina chelum ti digaga ari rutan. Lelaki ngena sirat tauka  pekayan nadai bechura tampak.

            Orang ti pandai nyampi lalu nyebut Sampi Ngetas Ulit.

            Sida ti deka ngetas ulit lalu betusun lalu bejalai niti ruai. Udah nya orang ti benama tauka orang ti udah bedengah lalu netak mimit iku sirat orang lelaki lalu ngerat tina sida ti indu.

            Udah nya buk sida lalu diguntin mimit; kening enggau buk diberi minyak lalu disugu; darah manuk dilut di jari sida lalu gari manah lalu dikena. Udah nya semalam nya orang lalu rami, ngirup, makai.

            Pagi siti, ma ti udah diisi enggau perengka ti dikena iya maya iya agi idup suba lalu dianjung ngagai pendam. Utai dipakai baka jani, manuk, asi pulut enggau penganan mega disimpan dalam ma nya. Beliung enggau kapak mega diengkah dia. Utai tu dikumbai baiya. Enti orang ti mati nya indu, pekekas indu mega diberika baiya iya. Timpa enggau raga ti bekeremit ti dianyam maya ngentupat puang mega lalu dibai ngagai pendam. Kadang-kadang sungkup mega digaga di atas pendam sida.

.

      II   Siti agi gawai ianya empat iti ti dituju ngagai Pulang Gana ti Petara tanah. Iya diau dalam tanah. Semua gawai tu bekait enggau bumai sereta minta saup Pulang Gana ngasuh pengawa bumai sida mujur. Dalam semua gawai tu orang ngambi lemambang mengap - siku matak jalai, siku penimbal lalu dua iku ngelembung. Orang ti matak jalai, nusi pejalai  bala Petara ti ngusung orang ti begawai. Iya ti nimbal nya ngasuh pengap iya ti matak jalai nya nenak agi lalu iya bisi chukup penemu nukar iya ti matak jalai nya lebuh siku nya nyau lelak. Seduai ti ngelambung nya mega ngemanahka leka pengap lalu kadang-kadang sida beramban. Ramban sida nambah ke reti enggau pemisa pengap. Tang kadang-kadang sida beramban nundi orang indu ti bisi ninga ke sida ngambika orang ketawa lalu enda tinduk. Orang bukai ti nemu beramban tau minta tungkat ari seduai tu lalu nimbal ramban seduai iya. Kadang-kadang, bala indu ti kena tinggang ramban sida ti lelaki ngerampas tungkat lalu beramban nimbal sida ti lelaki. Tu ti suah ngasuh bala pengabang tachuh ketawa lalu enda tinduk.

            Udah pengap embih, udah bala Petara datai, jani lalu disugu lalu dibunuh lalu atau jani nya lalu dibacha. Enti atau nya jai, orang lalu mengap baru lalu munuh jani siku da.  Pemanjai pengap bepanggai enggau penyuah orang nya udah begawai. Enti iya enda kala begawai, pengap orang semina naka ngalu Petara tang enti sema iya udah bisi empat kali udah begawai tauka udah bedengah pala munsuh empat igi, pengap tau datai ba nugal  Enti iya kaya, bepemandai lalu beberita tauka udah bulih pala bepuluh igi, iya ti begawai tau ngasuh orang mengap dataika nempalai kasai.

            Gawai ti bisi bekait enggau Pulang Gana ianya baka ti di baruh tu:

(i)              Gawai mandi rumah, mangkong tiang, tauka muai rumah . . . . Pengawa ngerami rumah baru. Minta Petara merekatka rumah baru awakka rumah nya chelap lindap lalu orang ti diau dia betuah belimpah, gayu ratu, gerai nyamai sereta lantang senang.

(ii)             Gawai Batu . . . Gawai tu dikereja maya baru deka bumai. Gawai tu dikereja awakka Petara ngasuh semua utai ti diansah ngena nya  tajam dikena nebang, nebas enggau besiang tauka mantun umai ngambika  padi ti ulih lalu mayuh sereta bejumbuh.

(iii)          Gawai Benih . . . . Gawai tu dikereja sebedau nugal tauka sebedau ngaga chemai. Dalam gawai tu orang minta Petara ngasuh sida mayuh bulih padi, bulih puli awakka sida senang lantang.

(iv)           Gawai Jagu tauka Gawai Ngemali Umai........Enti padi mayuh dipakai ulat, mayuh dipakai empangau, sintak tauka buntak, orang ngereja Gawai Jagu tauka Gawai Ngemali Umai. Dalam Gawai Jagu, orang ngaga dua iku jagu ari tanah lalu dipiring. Dalam leka pengap lemambang, jagu tu bejalai makai semua utai ti ngachau umai lalu ditaban sida ke tasik. Bakanya mega dalam Gawai Ngemali Umai, bala Petara mukat lalu mai bala indu utai nya ke tasik ngena bangkung. Nya meh maya tumu pagi udah tembu pengap, orang  ngelepaska perau mit di sungai ti bedampih enggau rumah orang ti begawai. Perau ti dikira mai semua indu utai, semua chit, semua pipit ngagai tasik besai leledung lelinang awakka sida enda ngachau umai agi.

(v)             Gawai nyimpan padi . . . . Tu gawai dikena besimpan padi dalam gentung tauka tibang. Padi disimpan  maya iya udah dijembi, ditampi enggau udah dikerekai. Maya gawai tu, orang nyimpan padi dalam gentung di atas sadau. Orang ti dikangau datai enggau besimpanka padi nya. Udah tembu besimpan orang siku lalu nyampi awakka padi nya jedian lalu enda nemu kurang.

            Enam iti gawai ti bebesai udah tu mega ngena jalai pengap tang ditujuka Sengalang Burung, ti Petara di langit. Semua gawai tu mega bekait enggau pengawa ngayau.

(vi)           Gawai Burung tauka nikau ka Burung . . . . Gawai tu dikereja awakka orang ti nirika gawai betuah lalu bulih mayuh pala munsuh tauka bulih mayuh ulun lebuh iya nurun ngayau.

(vii)          Gawai Enchabuarung . . . . Gawai tu didirika lebuh orang ti udah pulai ngayau lalu udah bisi bulih pala munsuh. Gawai tu mega dikena naku sereta ngantung antu pala dalam ringka gantung.

(viii)       Gawai Kenyalang tauka Bekenyalang or Gawai Tras . . . . Kenyalang ti udah diukir, udah diraut, udah dichat diengkah di atas tiang sandung merenung tunga ngagai menua munsuh awakka iya mantuk mata bala munsuh lalu nyamai dialahka kitai.

(ix)           Gawai Ijuk tauka Ijuk Pumpong tauka Sandau Liau . . . .Enti orang nya udah Gawai Kenyalang empat lima kali,  lalu mega udah ngalahka bala munsuh, iya tau nirika gawai tu. Dalam gawai tu ai tuak diengkahka di atas tiang sandung

(x)             Gawai Gajah tauka Begajah . . . . Gawai tu dikereja tuai ti jelai nama, jelai berita ti udah mayuh bulih antu pala. Gawai tu mega dikena masa semua antu pala ti udah ulih iya. Laban gawai tu gawai ti pemadu tinggi, enti orang nya udah nirika gawai tu, iya enda ibuh begawai agi enti sema iya bisi ngayau baru lalu bulih antu pala baru. Gawai Gajah tu jarang bendar dikereja. Ke penudi iya dikereja kira dalam taun 1920 ulih Iban Skrang penama Ginching ti diau di Undup. Dalam gawai tu, kayu ti udah diraut nyadi gajah diengkah di atas tiang sandung ti tinggi.

(xi)            Gawai ranyai taukar Beranyai . . . . Tu gawai ti pemadu besai kala dikereja bala Iban. Dalam gawai tu, semua pala munsuh ti udah ulih orang diengkah dalam chapan. Mayuh macham sangkuh digantung ngelingi chapan nya. Orang siku ti bengepan lalu mega udah bedengah duduk ngimpai chapan nya. Udah nya siku orang ti bengepan lalu ngena nyabur iya ngetas semua tali temeran enggau tali rutan ti dikena ngantung sangkuh dia awakka semua sangkuh teberubuh ngelingi orang ti duduk nyendi chapan ti endur antu pala melunggu nya tadi.

      III   Kelimpah ari ti udah dipejuraika di atas, agi mega bisi gawai ti enda bangat berat. Gawai bansa tu ianya gawai ti diintu lebuh orang bisi mimpi jai;  ninga burung jai, tauka rumah bisi ditiki burung jai; ngintu diri lebuh baru udah gerai ari penyakit ti lama ngenusah; ngerami tuah ti manah laban udah chukup pemisi dikena meli tajau laban dalam pengarap Iban, tajau bisi semengat ti tau ngemata sereta nulung kitai.

 

(Tipan Gawai Antu tu ulih aku berandau enggau Cikgu Bennet ari Bijat, Simanggang enggau Tuai Rumah Banseng ari Bukit Balau. Enti tipan tu bisi rabang arap ka bala kitai meri komen di baruh nya tauka nulis ba fb.)

Tipan Gawai Antu

A. Berandu ka begawai

         

Kira setaun tauka dua taun sida ti bempu rumah baum ngiga maya nudukka Gawai Antu. Sida baum tumu awakka semua orang nemu lalu besedia, nupi manuk, nupi jani, betanamka padi tauka ngereja utai bukai ti deka dikena begawai.  Orang diatu ti bekereja makai gaji lalu belabuh ngalau duit tauka belabuh bebelika arak embar dikena nyibur bala pengabang lebuh sida datai ila.

Di rumah panjai, gawai tu dikereja orang nyau lama baru sekali awakka mayuh agi orang bisi enggau laban semina orang ti bisi antu aja ti enggau dalam gawai tu. Orang ti nadai antu semina nyumai lauk sereta nyediaka utai diirup dikena nyukung pengawa orang ti bisi antu.

B. Mangka

          Kira dua minggu sebedau nyadi, sida ti bisi antu, reti nya bisi orang deka diintu, bisi deka ditanamka regang lalu ka pendam ngambi isang. Sida nya batabuh maya mansang enggau maya pulai. Lebuh pulai, sida ti ngambi isang lalu manjung. Isang nya lalu dikerih, digantung ba mua pintu. Lebuh semengat orang ti mati meda, nya baru sida nemu diri udah mati.

C. Ngaga Langkau Antu

          Udah pulai mangka, sida serumah lalu besaup ngaga langkau antu enda jauh ari kaki tangga rumah panjai. Langkau tu dikena nyambut orang ti mati luluh, sida ti mati lukuh. Sida tu enda dibai niki ka rumah laban sida jai gambal. Sida tu mega dijangka malu niki nangika gambal diri ti jai. Ketegal nya,

D. Milih lalu ngaga Indai Bilai

          Tuju pengawa tu ianya sida ti indu ngaga ai tuak antu. Sida ngambi lia, lengkuas kayu manis, chengkih enggau  entumbar. Semua utai tu ditutuk sida begulai enggau berau, udah nya lalu diluai enggau ai mimit. Udah digulai, utai nya lalu nyadi chiping. Iya ditempap-tempap, digaga baka penganan lalu dijembi dataika rangkai.

          Udah chiping nya rangkai, sida ti indu lalu nyumai asi ti lalu digerami sida enggau chiping nya. Asi ti udah digerami nya lalu disimpan dalam tachu, dikait di tisi mua pintu lalu dikumbai Indai Bilai.

          Pengawa Indai Bilai ianya nyaga antu Sebayan awakka enda tama ke dalam bilik.

          Enti orang nya ngitang siti tachu Indai Bilai, reti nya sida ngintu siku aja antu lalu enti ngitang dua, sida iya ngintu dua iku antu.

E.  Hari keterubah

Ngentupat puang.

Hari tu orang beranyam, besumai ka lauk lalu mega bepansuhka pulut.

F. Hari nyadi

Pagi

Nyabak dalam bilik

Nyabung

Nyimpan ma

Udah makai tengah hari

Nyedia ka tina, pinggai, kain chelum tanda ngulit

Lemai

1. Ayun lemambang ti nyabak dipindah ka ruai.

2. Orang ti ngulit betusun. Orang ti nguli ngena baju chelum. Ti indu ngena tina.

3. Nyebut sampi ngetas ulit.

4. Ngetas tina enggau kain ulit

5. Ngendas kening orang ti baru udah ngetas ulit enggau darah manuk.

6. Meri minyak sereta nyugu orang ti baru udah diketas ulit

7. Orang ti baru udah badu ngulit masuk ka gari gap.

8. Ngirup ai garung beranggung

         

Ai tuak disimpan dalam dua iti buluh, diengkah di tisi dinding, dikarung enggau kulit ti udah dianyam. Ai tu semina tau diirup orang ti udah bedengah. Lebuh dituang, ai tu nadai tau lilih, nadai tau nyaya.

Sebedau orang nya ngirup ai garung beranggung, orang ti tuai baka Tuai Rumah lalu nanyaka jejuluk. Maya tu, orang bukai nadai tau dampih laban ai nya nali siuh.

Enti sema nadai bisi orang ti udah bedengah bisi dia, ai nya lalu nadai diirup tang lalu ditempalung ke tanah.

9. Ngaga pengerami

10. Lemambang sabak nerus ka sabak iya

D. Tumu pagi hari ketiga

1. Nganjung baiya ngagai pendam. Utai ti dianjung nya lanji ti penuh enggau gari sereta pemakai, perengka dikena idup di Sebayan baka beliung, kapak

 

LEKA DUNGAI BELEMATANG (4)

Dungai Belematang tu ianya siti main bala Iban di menua Balau ti pemadu pemanah ari segi tusun sereta leka jaku ti dikena. Iya nusi pengerindu indu dara enggau orang bujang ke pangan diri. Jalai dungai tu bisi sebaka enggau renung ari Saribas.

Dalam tipan siti tu Kumang Jawai bejalai ngagai menua orang begigaka jayau dikena iya nyayau Bujang Lang Ngindang ti nyau lama amai nadai datai ngayap iya. Batu silui bulan nya tau diambika jayau laban semua orang rindu amai meda bulan. Nyadi enti kitai bisi jayau nya, semua orang rindu meda lalu deka ka kitai. Pia mega batu kui tauka batu ruti, laban semua orang rindu makai ruti. Bakanya mega semua orang rindu deka megai sereta rinduka kitai enti kitai ngembuan batu kui tauka batu ruti. Bakanya mega batu gula. Semut rinduka gula. Semua orang rinduka gula. Enti kitai bisi jayau batu gula, semua orang enggai rari ari kitai lalu deka mgulai kitai belama-lama.

Di genteran ti penudi sida nyau mukul wireless enggau talipaun. Tu nunjuk ka orang ti bedungai tu ngaga dungai tu kira dalam taun 1930 ngagai taun 1960. Maya nya enti orang deka ngirum pesan, sida ngena wireless, enda ngena jaku. Maya bekngau enggau orang ti dampih baru sida ngena talipaun.

Renyaya Bujang Renyayan Nadai Jayau Batu Silui Bulan

Eh...baru hari teringkas tawas,

Matahari pen nyau pegari tampai teban,

Nya baru seduai beranyut nitihka penyurut pasang nyebam,

Datai di ai ti bereni nyalin ngentupan.

Datai ditu endur seduai ngetu seduai ngentipu lebu ngetan,

Nanya ngagai Renyanya Bujang Renyayan,

Nya meh orang ngemeranka ai ngentupan naka penundan,

Kasih dasan tibang engkelai.

"Eh...ni nuan Aya Renyaya Raja Renyayan,

Engka nuan bisi ngemeran ka batu silui bulan,

Meri kami duai menyadi sebuni saum dalam."

"Nadai pan aku," ku Renyaya Raja Renyayan.

"Ka pan tua enda beranyut nitih ka penyurut pasang nyebam."

Raja Genali Nadai Jayau Batu Kui

Nya baru seduai datai di ai bereni salin bebuai,

Nya baru seduai datai ba menua raja,

Seduai datai di Renyayan Raja Genali,

Nya orang ngembuanka ai bebuli nyadi

Enggau sentali sayang Gumi tibang tengkalai.

Ngetu ga meh seduai nanya Aya Raja Genali,

"Ni nuan bisi nyimpan peminan batu kui

Berika kami duai menyadi, sua enggau jari;

Ka enggau kami ngemulaika Ngelai Keling Berani,

Awakka iya ninggalka mengada iya karung mengadi,

Nuan ga Raja Genali ke bejari mansai kerangan rangkai."

"Uh dini kala aku meda utai nya endai Paga Kumang Mereti,

Kami tu nadai bisi ngemeranka batu kui."

Apu! Lalu dikejang Endu Kumang Dara Mereti,

Menua Raja Genali orang ti bejari chapai-ga-chapai.

Sultan Mukul Wireless

Alu tepanggai bejalai perau seduai

Lalu deka tuntung da pantai

Keranjai Ansa Tanjung Bakelung Ular Naga,

Lalu berenti Kumang Mereti dibai bungai Rampang Bunga,

Nya menua Sultan Tuan Raja,

Lalu niki seduai menyadi ti nyau deka sebuni saum mengada;

"Apu wai! Kenu, dek ga bisi nyimpan peminan batu gula,

Berika kami duai menyadi ti sebuni saum mengada."

"Apu, anang guai wai, uji aku nekih tiang wireless jerih."

Ee...lalu da tekis tiang wireless sambung temaga,

Dientun ke dara endun talipaun munyi ridun naning gila.

Pantun Betaban Rari

Aih nyau terebai tua wai Kumang Sambai

Saharitu nepat menyaung tuchung langgung

Bukit galau keladan,

Datai din baru tua ingat lanjur nepan,

Tapa kaki nuan Kumang Menti

Berindik di segi semilu batu tajam,

Ba atas pala nuan Kumang Lenta

Tata aku enggau lala minyak jayau jematan,         

Enti sema tua bejalai janggi ambai ngerandai tatai,

Nengah genting  maring sambut renjan

Ka tua teulih ka sekunsi jadi  lanjur ai...betaban.

Ai...enti ka sema nuan ngema raga Kumang Lenta

Tunjang dua delapan,

Aku ka ngepit samit Kumang Mit,

Ka kajang ai...punan.

Ai...enti ka sema hari jai saharitu asi menyadi

Lunggur ujan,

Aku pandai nenun ka nuan

Kelambi be..baju ai...kanggan.

Ai...enti ka sema langit runtuh asi menyadi

Remang bekayuh, pasang menuh,

Aku pandai naruh nuan ari baruh

Pun terung ai...pitan.

Ai...enti ka sema langit ruat asi menyadi

Remang biganyat, tanah rentap, pasang beseranyat,

Aku pandai nyelikap ka dek da urat

Pun ai...ridan.

Ai...dia anang besengkakai enggai

Dek Kumang Jawai,

Tantai ka aku binjai ai tuak arak

Beram padi asam,

Tantai panggai aku liba ambai

Tubuh ai...rempam.

Enti ka  sema nuan enggai

Rumban tu endun rumban

Ngagai pun kara dapan

Menua Bujang Lelungan,

Menua Bubut tutup di kanan,

Nya urang mangkang pun Titi Rawan

Dudi ditepan dulu tebelunggan

Aih kumang, tebelungging aih.. lungging.. tunsang

Aih... irup engku tu irup

Ai tuak arak beram padi kujam,

Nama ketakut riput bebadi lesi ilang meh danjan

Ukai tu duku liban endu, gemar pendawan,

Ukai tu sangkuh bemata tajam,

Ukai duku tu saharitu gemar pendawan,

Ninga nama ti ka takut riputBebadi lesi ilang danjan,

Aku tu pandai maya ka dek pua bali belantan,

Pandai nyirap ka dek atap jaung singkawan,

Saharitu anang ga nuan besengkakai enggai

Kumang wai makai bejambai binjai engku tu,

Ai tuak arak beram padi asam,

Enti ka sema nuan nuan enggai Kumang wai,

Rumban tu endun rumban,

Ngagai menua Sujai tuai Sebayan,

Menua Kumang penagang hari ujan.

Ai...menua Duat penyukat danau Sipanan,

Menua Sigih ti mantih hari malam,

Nya urang di ai Limban,

Ti sukat bah ayan kerangan,

Ti sukat langkang ampuh aih...emperan.

Setaun ia degum-degum,

Sebulan ia deram-deram,

Urang da Mandai Ingan

Ku aku sidan ka besimpan

Aih ngenang nya Kumang

Sa sinu ai...ngenang...