CHERITA ENGGAU ENSERA DUNGAI BELEMATANG

                                                              (Tipan Ketiga)

            Ditu kitai nampung cherita enggau leka dungai belematang ti diambi aku ari niang Tuai Rumah Tulis suba. Cherita tu udah ditusun sereta digaga aku nyadi bup ti bekulit keras laban penemu bansa tu nadai agi laban semua lemembang kitai udah parai magang. Enti bala bala deka ngembuan bup tu tauka iya ti bukai, tau nemuai ngagai fb dayakibanworld. Dia aku bisi meri semua rega bup Iban kitai.  Enti terus deka meli  bup tu tau sms aku ba 0193827107 atau nyimpan rm 29.00 CIMB ac 1103 0037153 525. Rega tu nyengkaum rega ngepos bup tu ngagai semua orang ti meli.

Tampung dungai belematang ari ti suba.......

 

            Nyau sinu deh semengat rampang bungai ti diengkah Kumang Jawai di penindok ninga randau Kumang Jawai seduai indai iya. Kelia nadai bisi minyak wangi dijual orang di pasar. Nya kebuah bala indu dara kelia, nyembi bungai ti bau rengut lalu rampang ti nyau rangkai lalu ditabur ka sida di peninduk sida awak ka bala orang bujang rindu ngayap ngagai peninduk sida.  Semengat rampang bunga lalu mali diri nyadi mensia.  Iya lalu ngangau ka Kumang Jawai enggau nyawa ti chukup pengerindu sereta penoh basa.

            Orang kelia arap amai ka jayau dikena ngulih ka ati pangan diri awak ka orang terus deka ka bini tauka laki. Pugai reti nya jayau. Enti bisi nemu ti baka gula tauka manis baka gula, nya tau ka jayau lalu dikumbai batu gula. Enti kitai bisi nya, enti kitai indu tauka lelaki, semua orang bujang bekerudus berebut ka bepangan enggau kitai laban ulah enggau mua mata kitai manis baka gula. Silui bulan mega jayau bisa laban semua orang rindu lalu enda leju leju meda mua kitai. Bakanya mega orang rindu amai meda kitai enti kitai ngembuan silui batu bulan.

            "Kitu ka dulu dek Endu Tematu Telu Ketupong Banda, sinu amai aku ninga serabana nuan nya" ko Rampang Bunga.

            "Enti dek bisi penyinu, tulong meh aku wai," ko saut Kumang Jawai.

            "Enti dek nadai, begiga jayau meh tua," ko Rampang Bunga, "uji tua merau Dara Kembut nitih ka penyurut pasang raya."

2

Ngiga Jayau Ka Tasik

            Pagi siti, udah makai, udah indah, Kumang Jawai seduai Rampang Bungai nurun ka tepian ai, muka tali perau lalu mupok bekayoh beranyut nitih ka penyurut pasang raya.

            Enda lama seduai udah bekayoh, seduai lalu datai di lubok dalam siti.  Lubok tu menoa Bunsu Ikan Juara.

            "Diatu meh endor tua ngetu sekejap, singgah belepa," ko Kumang Jawai.

            Bunsu Ikan Juara pan lalu pansut.  Ai nyau tekesai, nyau bereni endor iya mansut ka diri.

            "Apo! Nama pejalai seduai ti bangat begaut gaya?" ko Bunsu Ikan Juara nanya.

            "Nadai pejalai bukai kami tu, ngiga pugai batu gula.  Bisi dek ngembuan utai nya?" ko tanya Rampang Bunga.

            "Aku nadai nemu utai ti bansa nya, enda ngelala," ko saut Bunsu Ikan Juara.  Iya pan nyau mega enselor nuju apak ti dalam agi.  Semina reni iya aja ti agi meruan.

            Udah belelak seduai mupok baru nitih ka bungai pasang bebunga.  Nyau kelama seduai pan datai di menoa Laut Senganan.  Laban hari nyau laun seduai lalu bebai bemalam.

            "Ditu meh tua wai berenti singgah bemalam," ko Rampang Bunga, "China tau endor tua nyapa, tau ambu ka pangan.  Laut tau lagi wai endor tua nuntut batu ikan.  Sapa ti meri tua siti lagi ambu ka kaban entu nya tau ngasoh ambai nuan dudok dedapan mulai ngagai kitai."

            Udah nyumai, udah makai lemai nya seduai begaut niki ka kampong Laut nanya sapa ti bisi ngembuan jayau.  Semua orang ti ditanya madah ka diri nadai ngembuan utai nya.  Udah nengah kampong Laut seduai mulai ka diri ngagai bala China, tang bala China meda madah ka diri nadai ngembuan, nadai nyual utai ti bansa nya.

 

 Leka dungai belematang......

Eh...ti bakatu nya baru legai ngelanggai sungai,

Nyelai ka unggit pelipir bukit;

Udah iya nanya indai,

Baru iya dikangau ka bangkit,

"Kitu ka dulu dek Endu Tematu Telu Ketupong Banda,"

Berandau seduai iya Kumbau Dara Jelia,

"Uji tua ngiga,

Begiga neh Inya, majau menoa,

Uji tua beranyut neh Dara Kebut,

Nitih ka penyurut pasang raya."

Kumang Jawai Enggau Rampang Bunga

Nasik Ngiga Jayau

29

Di pegai pinggai ensarunai chapak ensaruja,

Peda lalu digiak enggau tesap besi baja,

Lalu da sarunggong iya enggau labong lambar setera,

Lalu nepan Dara Sudan seduai Rampang Bunga,

Lalu beranyut nitih ka penyurut pasang raya,

Lalu tepansa ka menoa jeliu bunsu ikan juara,

Lalu ngetu Dara Bunsu lalu singgah belepa,

"Kami duai beguai amai sigi nadai pugai batu gula,

Nadai nemu utai nya jalai ngelala."

Nya seduai lalu nyau nitih ka bungai pasang bebunga,

Datai di Seputut Laut Senganan di segera titi dan,

"Ditu meh tua wai berenti singgah bemalam, begiga,

Endai, China tau endor tua nyapa kaban pangan,

Laut ditu tau endor tua nuntut

Wai mancham batu ikan,

Engkaicha iya tau peda dedapan mulai ngagai kitai."